المجلس العسكرى .. 100 يوم و 10

النهاردة هكتب تدوينة ” سبيشيال” للمجلس العزيز

بمناسبة إن المدونين قرروا يتآمروا على مصلحة البلد والمجلس معا..

ويكسروا حاجز التواطؤ الإعلامى على مصر
المدونين قرروا ينتقدوا المجلس… واحنا معاهم
فى البداية أحب استعرض معاكم انجازات المجلس العظيم خلال حوالى 100 يوم و10 منذ توليه الادارة
ملحوظة : المجلس الأعلى  طبعا هو المسئول الأول عن كل مايحدث خلال هذه الفترة
خلينا الأول نكتب المطالب اللى المجلس استلم عليها ادارة العزبة ( مطالب الثوار فى الميدان )
إسقاط النظام … دا المطلب الكبير قوى وعايز رغى فى تفسيره ..اركنه دلوقت
ولأنه مطلب كبير فالناس قبلت بتجزيئه .. عشان تخلص  الثورة وتروح الشغل الصبح !!!
1- تنحى الرئيس مبارك
2– حكومة انقاذ وطنية تدير الفترة الانتقالية .. وحل مجلسى الشعب والشورى
3 – اسقاط دستور 71 وعمل دستور جديد .. تعقبه انتخابات تشريعية ورئاسية
4 – حل جهاز أمن الدولة والاشراف القضائى على الشرطة
5 – محاكمة رموز النظام السابق .. ومحاكمة قتلة المتظاهرين
6 – حل الحزب الوطنى .. ومنع كوادره من ممارسة الحياة السياسية لفترة
مش دى كانت المطالب الاساسية .. ولا إيه ؟
+ مطالب اقتصادية اساسية 1
– حد أعلى وحد أدنى للأجور بنسبة مثلا 1: 15
+ زليارات المطالب الفئوية ( الغير فئوية بالمناسبة) العادلة
1– اقالة المحافظين وجعل اختيارهم بالانتخاب
2- حل المجالس المحلية لأنها كالدودة الشريطية .. تمتص موارد الدولة
3 – اقالة رؤساء الجامعات وعمداء الكليات
4– مطالب الاطباء وغيرها الكثير
مش دى مطالب لم يختلف عليها أحد .. صح؟؟ إتحققت ؟؟
آسف على الاسهاب السابق..
نخش بقى فى تقييم المجلس ( سياسيا) ودا حق مكفول لكل حيوان فى البلد فضلا عن البنى ادمين.. يعنى مش هتكلم بالمنطق والشواهد والدلائل والاستنتاجات اللى بتؤدى لنتيجة واحدة صريحة الناس خايفه تشوفها

مالاخر دى تدوينة ” أورديحى” عشان الناس اللى لياقتها الذهنية قليلة وبتحب جو المصاطب

نبدأ ..

المجلس تعهد من اليوم الأول .. يوم 12 فبراير .. تأييده لمطالب الشعب العظيم
وكلنا استنينا الخطوة الأولى …
وطلع علينا بخبر . (تعليق العمل بالدستور ) وحل المجلسين .. حلو جدا ايه المفترض بقا يتعمل ..
دستور جديد … صح ؟ قالك لأ .. لجنة لتعديل مواد معينة فى دستور 71 .. اللى بالصدفه هيا هيا المواد اللى ( المخلوع) اقترح تعديلها .. واديناله سكة
سبحان الله …
المجلس أعلن تمسكه بحكومة شفيق .. علل ؟ وما اتشالش الا ما علاء الاسوانى هلهله على الهواء ..
جه عصام شرف من الميدان .. ووزارته من ( مصطفى محمود )
كل الوقت دا .. ومفيش غير نص مطلب هوا اللى اتحقق
… نييجى بقا لأمن الدولة .. اللى ظهر قوى بعد إقالة شفيق.. ووجدى ( ممكن تستفيد فى اجابة علل اللى فاتت )
أمن الدولة حرق مستندات .. والناس اقتحمت المقرات .. و..
سؤال عابر .. هوا مش اللى حرق المستندات دى بيضر بالأمن القومى ؟؟؟ مش المفروض يتحاكم ؟؟؟
بالنسبة بقا لملف جهاز الشرطة وأمن الدولة
شالو وجدى .. وجابو عيسوى
وجه عيسوى .. الراجل الطيب وقرر القرار العظيم .. حل أمن الدولة .. وإنشاء الأمن الوطنى وقتى كده .. وبدون إشراف قضائى ..
كدا الشعب لبس القرطاس التانى .. الأول كان مطلب الدستور الجديد
بالنسبة بقا للمحاكمات .. بعد مرور 100 يوم  وشوية على الثورة
لما حبيب العادلى يتحاكم بتهمة (( غسيل الأموال)).. ولسه متحاكمش بتهمة قتل المتظاهرين ولا تفجيرات رأس السنة
لما مبارك .. يتهم بتهمة التربح ..ولسه متحاكمش .. والانكى بقى …

تصريحات رسمية من جهاز الكسب غير الشروع : ثروة مبارك متواضعة

لما .. صفوت الشريف .. لسه متحاكمش
لما عز .. لسه متحاكمش
لما سرور خد براءة
لما زكريا عزمى .. اخلى سبيله
لما سوزان .. خدت براءة
لما جمال اتحفظ التحقيق معاه ..
فين حسين سالم  ؟؟؟؟
لما قتلة المتظاهرين ( القتلة المباشرين) لسه بيتأجلهم مرة فى التانية فى التالته .. مع ان فى شهود وفيديوهات
يبقى مين بقى اللى أكل الجبنة ؟؟؟؟
تم حل الحزب الوطنى … حلو .. بس كوادرة لسة بتلعب ودخلت احزاب جديدة .. صباح الذكاء العسكرى الخارق للعادة
ولم يكتفى المجلس فقط بتنفيذ مطالب الثورة .. بل إنه زاد وأبدع
1- عمل فتنة بين المصريين … أيوه .. عن طريق الاستفتاء العظيم..أثار الفتنة وقسم الشعب بسهولة منقطعة النظير الى : إسلاميين
و
علمانيين وليبراليين ويساريين
الغريب .. إن المجلس بعد ماعمل الاستفتاء ( فى ظل الانفلات الأمنى المزعوم ) .. مبقاش عارف يعمل ايه بقى ؟
قعد يخبط شوية وطلع بإعلان دستورى فظيع مريع..
كل اللى فهممته منه إن المجلس .. هوا بابا وهوا ماما ( هو البرلمان والرئيس) ومش هيفقد صلاحياته دى غير لما نعمل انتخابات ومحددش دستوريا هيا إمتى ؟؟؟…. تن تن تن
2 – قانون تجريم الاعتصامات …. تن تن تن …تانى
3- الشروع فى اصدار قانون التصالح مع رجال الأعمال..
يعنى حضرتك عارف انهم عملو حاجة غلط اهو ؟! وطبعا يا ولاد .. اللى بيعمل حاجة غلط .. المجلس بيصالحه!
4 – تكهين نبيل العربى .. عشان شاف نفسه شوية زيادة فى التصريحات
5- قانون مباشرة الحقوق السياسية .. واللى منع المصريين فى الخارج من التصويت.. والغريبة إن المجلس نفى الكلام دا قبلها .. وفاجئنا بالقانون اللى بيناقض تصريحاته
6- محاكمة المتظاهرين .. عسكريا شأنهم شأن صغار اللصوص والبلطجية ..أما الكبار فمدنية مدنية ..لا ثورية ولا عسكرية
7 – فى نفس الشهر اللى حل فيه أمن الدولة .. جابلنا الشرطة العسكرية
تعذيب عربى .. ام الاجنبى
ممكن نتفرج سوا …
معانا هتك أعراض ..
معانا كمان .. إهانة وتعذيب

التعامل مع المتظاهرين أمام السفارة

وطبعا كان واضح الغياب الأمنى فى مصر يومها .. بدليل الأمن المركزى اللى طلع من البلاعات
معانا كشف عذرية .. للسادة بتوع كاميليا وعبير
معانا اطلاق رصاص حى على المعتصمين يوم 9 ابريل الأسود
طبعا يا جماعة .. دا مش رصاص حى ( لو كنت نزلت تانى يوم وشفت الحواجز كنت هتعرف) ..
دى رشاشات مياه .. والجيش كان نازل يصطاد بط
وطبعا  .. نفى .. نفى … نفى  للصباح الباكر
انا كتبت التدوينة دى (( عالسخان كدا)) وملحقتش استف لهم الأدلة .. ونسيت حاجات كمان
بس انت أكيد .. بتقرأ … وبتشوف
و..
بتفهم ..
أنا عرفت مين اللى أكل الجبنة ؟؟
لو انت كمان عرفت ..
انزل التحرير يوم
27

كـــــو رو مـــبو

🙂

Advertisements

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: